PARENTING

Wongtuwa Stres Merbawani Marang Anak

Duwe anak pancen nyenengake. Nanging, ati-ati nyedhaki anak nalikane kita lagi nandhang stres. Sebabe, bayi apadene anak-anak bisa nangkep sinyal negatif iki lan merbawani marang kesehatane si bocah.

                BELLA durung ganep setaun omah-omah wis kanugrahan momongan lanang. Nanging, keri-keri iki dheweke nembe nyadhari bab kang narik marang anake. Nalikan Bella nandhang stres, bayine melu-melu rewel. Contone nalika dheweke lagi kesusu-susu ndulang anake ing tengahing iwut tumandang gawe. Bayi umur wolung sasi kuwi uga malah angel diatur.

                “Dheweke malah dadi kerep nlepeh panganane lan angel glegeken. Banjur nalika dakdulang maneh, dheweke malah nesu ora gelem” kandhane Bella kang uga wanita karir kasebut. Ora mung Bella kang ngalami bab iki, menawa wae kita kabeh uga nate ngalami bab iki.

                Kamangka, bayi isih keciliken anggone bisa mangerteni omongan kita. Nanging, nyatane dheweke landhep pangrasane marang emosi lan mood-e wong tuwane. Dadi, aja gumun yen wongtuwa lagi stres, banjur mengaruhi marang bayine.

                Bab iki dikandhakake dening Andrew Garner MD, sawijining dokter anak saka Fakultas Kedokteran Case Western Reseve University. “Nalika wongtuwa lagi bingung, anak-anake uga bisa katut stres,” kandhane Andrew kang uga minangka anggota Perhimpunan Dokter Anak Nasional iki. Bab kasebut manut Andrew, adhedhasar panaliten kang wis ditindakake, becik marang manungsa apadene kewan. Bayi lan anak-anak mujudake titah sing paling landhep pangrasane.

Yen bayi nemen strese lan urpe geger wae, mula pungkasane bakal marang konsekuensi jangka panjang. “Dadi mangkane, nalika wongtuwone keli ing pamikire dhewe, mula kawigatene marang bayi utawa anak dadi kurang. Bab  iki ndadekake bayi dadi kasisih lan wedi,” kandhane Andrew.

Anak-anak uga sinau saka apa kang dideleng utawa kang sinebut ‘tindakan imitasi’. Yen dheweke weruh wongtuwane stres, anak iku uga bakal niru. Andrew aweh eguh pratikel marang wongtuwa supaya ngontrol strese. Carane, klawan narik napas sing landhung klawan itungan 10. Yen wongtuwa ora kasil ngontrol stres, bisa wae anak dadi seneng mbengok, nyonto lageyane urip ora sehat, lan wegah srawung.

“Kabeh iki bisa dumadi marang saben umur,” kandhane Sandra Weiss PhD DNScRNFAAN. Pnaliten kang ditindakake Sandra nemokake yen ibu nuduhake tandha-tandha stres, anak-anak sing umur rong taun upamane, uga bakal nuduhake tandha-tandha kang padha.

Malah, kedadeyan stres iki bisa ngowahi perkembangan uteke si anak. “tubrukan kang suwe marang hormon stres bisa mengaruhi marang uteg lan fungsi tinamtu,” tandhese.

Sandra njlentrehake rerangkene conto. Sebut wae “racun” stres iki bisa ngganggu sirkuit ing utek lan mengaruhi perkembangane. Dhuwure tingkat hormon stres bisa menet respon imunitase badan. Badan uga dadi gampang kaserang penyakit.

Kira-kira kita mikir merga saben dinane kita entekake klawan deadline ing kantor, lan mulih ing kahanan stres, kita mitayakake kesehatan mental sang bayi. Kamangka, dudu iku masalahe. Bayi kanthi pinter bisa ngrasakake wongtuwane apa nandhang stres kayadene bayine Bella.

Bayi utawa anak-anak ngalami owah-owahan ketege jantung lan derajat hormon. Nanging, yen wong tuwane utawa wong sing ngrumat aweh kenyamanan marang dheweke, dheweke bakal sinau ngontrol stres sing namani. Lan iki mujudake kemampuan urip kang wigati.

Sing wigati saiki yaiku supaya wongtuwa bisa ngatur tingkat strese. “Dadi, bayi kita ora kena pengaruhe sres kasebut. Klawan mangkono, kahanane ora perlu tambah kaco maneh,” kandhane Sandra. Ya sing genah, yen bayi ora ketaman stres, dheweke bakal tanggap marang kita. Mangane dheweke bakal luwih akeh, uga turune bakal angler alias wis ora rewelan.

Sumber: Panjebar Semangat, #8 25 Pebruari 2017